Bagong Simula

Gagawa na sana ako ng bagong blog para sa aking bagong simula. Para mas fresh, mas feel na feel ang pagbabago pero naisip ko na mahabang proseso na naman ang paglelayout ng blog at iba pang mga ka-ekekan na kailangan kapag nagsisimula ng bagong tapunan ng mga hinaing. 


Gusto ko lang namang ilabas itong saloobin ko ngayon. Hindi pwede sa Facebook dahil magmumukha akong nageemo at nagpapapansin. Hindi pwede sa Tumblr kasi walang magrereblog at baka mawala pa ang kakarampot kong followers. Lalong hindi pwede sa Plurk dahil ang korni na dun. 


Gusto ko lang sabihin na gusto kong kumawala. Pakiramdam ko ay nasa isang kulungan ako at gusto kong umalpas. Gusto kong tumalon sa bangin, magtambling tambling sa papawirin, at lahat ng inaalala ay aking pawiin. 


Makipagbreak sa boypren ko, magresign sa trabaho, magpakalayo layo at kalimutan ang mundo. Gusto kong kalimutan ang lahat at magsimula ng bago. Kaso kaduwagan daw ang tawag dun. Pero gusto ko pa ding subukang maging duwag kasi mukhang masaya yun.. 

Hola!

Kamusta? Napabayaan ko na ang blog na ito. Una, dahil sobrang busy ako sa trabaho at pag-aaral. Ikalawa, ay dahil hindi na ako si Paulakwatsera. Trabaho at aral na lang ang ginagawa ko araw araw araw. Maghapon at magdamag akong nakaharap sa computer at hindi na tulad ng dati. Masaya ba ako? Hindi ako sigurado.

Nakakamiss ng maligaw sa isang estrangherong lugar at kumausap ng mga estrangherong tao. Nakakamiss na ang dati kong mga pananaw sa buhay at ang dati kong istilo sa pagsusulat. Nakakamiss ang dating ako. Pero ganun talaga, the only thing inevitable is change.

At isa pa yan, yang pagsasalita ko sa wikang Ingles at pakikipagusap sa mga Amerikano araw araw. Naalala ko dati, pinangako ko sa sarili ko na di ako magpapaalila sa mga puti pero heto ako ngayon. Wala e, kailangan kong lunukin ang aking pride.

Paghumaharap ako sa salamin, ibang tao na ang nakikita ko. Gusto ko ba ang taong ito? Hindi ako sigurado. Masaya ba ako? Hindi ako sigurado.

Walang kasiguraduhan, ganyan yata talaga ang buhay. Hindi tayo sigurado sa lahat ng bagay at lalo na sa sarili natin. Pero marahil ay natatakot lang tayong tanggapin ang katotohanan.

Gusto kong maglakwatsa ulit.